搜查線:果癡研種日本水果 港產香印打出名堂

作者:June    發表日期:2018-06-04 12:45:17

元朗大棠有個士多啤梨園,名喚「士多啤梨園」,但能摘的卻不止於此。園內有兩處被劃作種植葡萄之用,現在雖過了當造的季節,但金屬棚架上仍掛着少量尚未熟透、被紙袋包裹的果實,紙袋之下,是香港人早前趨之若鶩的日本品種葡萄 ─ 香印提子。走進果園中央,便見到頭戴草帽、身穿寬鬆的長袖衣褲、皮膚曬得黝黑的楊博文站在太陽傘下,這位正是果園的主人,也是首位成功種出港產香印提子的農夫。

與團隊合作20多年,曾在台灣深耕細作,4年前回到香港開墾蔬果園。先不說蔬菜,單是士多啤梨園內也種了6種,而且幾乎全是日本品種。在種植士多啤梨方面,楊可說是個富經驗老手,但香印提子卻是去年12月的初次嘗試:「我有朋友係日本人,本身係做農場嘅佢建議我試下喺香港種,我覺得都可以嘅,咁咪試下囉。」除了埋下香印幼苗,還有巨峰、春光,以及在香港較少見的夏黑。「佢(夏黑)係有花香味提子,爽過香印好多,但又冇咁甜,冇香印咁濃花香味。」

引入日本品種的提子,其中一個原因是看中了它們對香港人的吸引力,但香港的天氣和日本始終不同,要成功種出日本種提子,當然不是單單淋水、施肥就能做到,日照、溫度、濕度差一點,結出來的果實品質可以完全不同,所以楊在背後所下的苦工不能小覷:「防颱風、夏天雨水多、溫差細、天氣太熱,呢幾個問題好主要。好似上次個10號風球,打到我啲棚都爛咗,啲雨水搞到成個園濕曬,咁我又要抽水,因為如果浸得太犀利,提子會死曬。」為種出好的香印,楊博文更請教朋友、改進技術,用綠色紙袋將提子包住,以防日照令它們變黃。「要花好多心機呀,如果唔係好易撞板。」

辛勤照顧近一年,終於在8、9月收成、成功種出提子,可惜慶祝豐收不久,果園10月遭賊人闖入,一夜砍去了近800棵提子,佔他的成果近一半。失去了提子、財產,損失50萬元,但無法衡量的還有投入的心血:「自己一番心血咁樣畀人鋸咗梗唔舒服,但諗深一層,都冇辦法,繼續種過囉!」但亦正因這破壞事件,傳媒的廣泛報道令香港人知道有「Made in Hong Kong」的香印提子,紛紛趕來採摘,最高峰時甚至來了4000人。本以為生意多了,楊亦為此感到欣慰,不料也有令他頭痛的事:「摘嘅時候佢哋有少少破壞性,一串畀佢哋一粒試下一粒試下,嗰串禿曬。提子一串畀人搣咗幾粒就好醜樣,個個有樣學樣,搣下搣下嗰串嘢變咗半串就唔好啦。」

距離再次收成,尚要等一年,但嘗新的精神並沒因此而被打消,楊指現時他們正嘗試培植白色的士多啤梨--淡雪。和香印一樣,要種出雪白的成功品並不易:「如果太陽曬得太犀利,會(紅得)同其他士多啤梨冇咩分別,喺日本嘅朋友教我哋,要遮太陽嘅時間長啲,但如果你遮得太犀利,佢產量又會冇。」淡雪現時已開了花,但他尚未肯定明年一月能否結出雪白的果,能肯定的是即使不幸失敗,他大概也會繼續嘗試下去。

日本旅行結婚 夢幻教堂加古老神社 締造完美嫁期


本文來源:http://hk.on.cc/hk/bkn/cnt/news/20171214/bkn-20171214060027928-1214_00822_001.html




Tag:
本文鏈接:http://www.dating852.com/55922.html