電玩吹兩嘴:萬聖節必玩《邪靈入侵2》

作者:Juliana    發表日期:2017-10-28 06:06:01

過幾日就係萬聖節,應節電‧競女梗係要同大家介紹番啲恐怖遊戲啦。講起日系恐怖Game始祖一定要提有「《生化危機》之父」之稱嘅三上真司,仲記得當年小時候偷睇阿哥夜晚玩《生化2》,就係畀隻撲出來的喪屍犬嚇到喊出嚟呀!聽講呢個月佢嘅最新傑作《邪靈入侵2》登場,唔知心血少啲嘅我玩唔玩得掂呢?

作為三上真司離開Capcom之後推出恐怖名作《邪靈入侵》的續集,故事設定在前作3年之後,警探男主角賽巴斯汀在「燈塔精神病院事件」失去一切而變得頹廢,呢個時候得悉原本葬身火海的愛女莉莉原來仲未死,於是決定再次進入幻想世界「STEM」拯救女兒。新作延續核突敵人和怪物,畀到大家刺激的官能反應,而且新作在主線外加入開放世界玩法,玩家可以在城鎮中接下支線委託,另外針對新手今次新增了安全屋系統,玩家只要逃到安全屋就可以免受怪物追擊,之但係電‧競女覺得會失去恐怖求生的無助感,拖低整體難度。

上周節目同大家介紹過以二戰背景為藍本的FPS遊戲《Call Of Duty:WWII》。今次趁萬聖節同大家講吓遊戲的原創合作模式「納粹殭屍」。玩家為了追尋在二戰中被軸心國竊取的無價之寶,將深入德國巴伐利亞的村莊中,展開一段陰寒刺骨又充滿謎團的旅程。原來埋藏在這座村莊中的秘密,竟然係一連串不人道的死屍復活實驗!而隨着黑暗不祥的劇情逐漸推演,亡者大軍蜂擁而至,大家睇住呀!

嚇完大家,鏡頭一轉分享番啲輕鬆小品手遊,任天堂轉戰休閒遊戲類別,剛剛在官方節目中宣布將於11月下旬在iOS及Android推出手遊《動物之森Pocket Camp》。遊戲玩法有點類似農場經營遊戲,採用免費下載及課金制,玩家將成為營地管理員,能夠邀請各種動物朋友到訪,透過接受動物朋友的委託來獲得素材,在營地隨意布置,或是在屬於自己的露營車裝飾家具,並可以採集水果甚至是釣魚,Kill Time一流。作品現已開放事前通知登記功能,首批將有41個國家或地區可率先遊玩,只是亞洲地區有新加坡和泰國也列入首發之列,就係無港台兩地,相信粉絲要等多陣喇!


本文來源:http://hk.on.cc/hk/bkn/cnt/lifestyle/20171028/bkn-20171028122053846-1028_00982_001.html




Tag:
本文鏈接:http://www.dating852.com/31404.html